Вонреден професор

Вон. проф. д-р Марјан Ѓуровски високото образование го завршил на Институтот за безбедност, одбрана и мир при Филозофскиот факултет на Универзитетот „Св. Кирил и Методиј“ – Скопје со просек од 9,19. Последипломски студии завршува на Институтот за социолошки и политичко-правни истражувања при УКИМ со просек од 9,55 со што се здобива со научен степен магистер на политички науки. На Институтот за безбедност, одбрана и мир при Филозофскиот факултет на Универзитетот „Св. Кирил и Методиј“ – Скопје ги завршил докторските студии со остварен просечен успех од 9,44 и по одбранета докторска дисертација на тема „Анализа на современите теориско концепциски пристапи во креирање на безбедносната политика на Република Македонија“ се стекнува со звањето Доктор по општествени науки од полињата на безбедност и одбрана-безбедност. Aктивно се служи со англиски јазик, српски јазик, бугарски јазик и хрватски јазик.

Во периодот од 30.09.2019 година до 05.06.2022 година ја извршувал должноста Проректор на Универзитетот „Св.Климент Охридски„-Битола. Пред тоа бил Продекан за наука и развој на Факултетот за безбедност-Скопје избран од Наставно-научниот совет на Факултетот за безбедност-Скопје на 31.05.2017 година.

Пред изборот за Вонреден професор на Филозофскиот факултет на Универзитетот „Св.Кирил и Методиј„-Скопје, професионалниот академски ангажман д-р Марјан Ѓуровски го остварува на Факултетот за безбедност-Скопје при Универзитетот „Св.Климент Охридски“ – Битола, каде со одлука на Наставно-научниот совет согласно Законот за високо образование бил избран во наставно-научното звање Асистент, Доцент и Вонреден професор во наставно-научните области: Друго-Безбедносни науки (51610) и (Друго) Меѓународна безбедност и меѓународни односи (51610).

Наставно-образовна дејност

Во рамките на наставно-образовната дејност д-р Марјан Ѓуровски има реализирано настава во сите три циклуси студии.

На прв циклус бил носител на настава во рамките на предметите Безбедносни политики, Основи на безбедност, Безбедносни стратегии, Кризен менаџмент, Управување со кризи, Дипломатија и меѓународна безбедност, Современи теории и концепти за безбедност итн.

Во делот на наставата на втор циклус на студии д-р Марјан Ѓуровски имал настава по повеќе предмети и активно учествувал како втор или трет реализатор во други предмети на втор циклус на студии. Бил носител на предметни програми за следните предмети: Безбедносни стратегии и менаџмент, Асиметрични закани, Теориско-концепциски пристапи и политики во безбедноста, Безбедноста во национален и регионален безбедносен комплекс, Одбранбено-воени и вооружени системи и трансатлански односи, Секуритизација и десукиритизација, Креирање на јавни политики во безбедноста, Одбранбено-воени и вооружени системи и трансатлански односи. Д-р Ѓуровски реализирал настава и на трет циклус на студии по предметите Мултулатерални европски организации и Безбедност и меѓународно јавно право.

Научно-истражувачка дејност

Во рамките на научно-истражувачката дејност д-р Марјан Ѓуровски имал повеќе активности почнувајќи од остварено коменторство на докторска дисертација, до реализирање на повеќе менторства на магистерски трудови, а треба да се истекне дека бил раководител на неколку меѓународни проекти, како и на неколку национални научни проекти. Меѓу другото учествувал во проекти финансирани од програми и фондови на Европската Унија, НАТО и УНДП.

„Аналитика“ како институција за истражување на јавните политики и ‘тинк-тенк’ во Република Северна Македонија д-р Марјан Ѓуровски го вклучила како научен истражувач во проектот “Western Balkan Pulse for Police Integrity and Trust -POINTPULSE” (Пулс за полициски интегритет и доверба на Западен Балкан), финансиран од Европската Унија преку IPA Civil Society Facility Programme (Инструментот за претпристапна помош на програмата (CSF) EuropeAid/136-034/C/ACT/Multi во периодот 2016-2018 година.

Д-р Марјан Ѓуровски учествувал и во Проектот на Европската Унија „Заедно градење – мониторинг и јавно застапување“ кој бил насочен кон подобрување на положбата на мигрантите и бегалците во Србија и во Северна Македонија, а особено меѓу нив на жените и децата. Исто така треба да се нагласи учеството на д-р Марјан Ѓуровски во проектот поддржан од Фондацијата Конрад Аденауер, во соработка со асоцијацијата „Атина“ и Здружението на правници на Република Македонија, со финансиска поддршка од Европската унија во периодот Ноември 2017-Декември 2018 година. Во рамки на проектот д-р Ѓуровски бил во студиска посета во месец Мај 2018 година во СР Германија каде посетил бројни академски и државни институции кои обработуваат теми од областа на миграцијата, интеграцијата и безбедноста.

Од меѓународните проекти можат да се наведат и проектите кои се реализирани: проектот „Lets Learn about NATO“, финансиран од Оделот на НАТО, а имплементиран од ГАУС Институтот во периодот Јуни-Декември 2020 година; „Democratic values and media freedom-DeMed values” Програма Еразмус + Клучна акција 1, Универзитет „Св.Климент Охридски„-Битола и Институт за јавни политики во Софија, Република Бугарија; проектот Intelligence Sector Reform Programme in North Macedonia (2018-2021), DCAF; проектот „PREVEX” Project funded by the EU Horizon 200 Research and Innovation Programme under grand adreement No 870724, Centre for Advanced Study-Sofia.

Покрај горе наведените меѓународни проекти, д-р Ѓуровски учествувал во работни тимови за подготовка и за реализација на повеќе национални проекти со поддршка на Факултетот за безбедност и тоа: проектот „Истражување на безбедносните ризици во Република Македонија (мапирање, етиологија, феноменологија и третман на безбедносни ризици); потоа проектот „Парламентарна контрола и надзор над безбедносниот систем во Република Македонија“; проектот „Регионалните безбедносни ризици и новите државни актери за време и по кризата од пандемијата Ковид-19“; проектот „Функционирањето на безбедносниот систем на Република Северна Македонија во кризна и сложена безбедносна состојба-менаџирање и справување со кризи“, како и проектот „Анализа на кризната состојба и справувањето со пожарите во Република Северна Македонија низ призма на функционалноста на системот за управување со кризи и заштита и спасување“.

Академското творештво на д-р Марјан Ѓуровски е големо. За тоа говорат објавените учебници, книги и монографии. Досега има објавено 4 (четири) универзитетски учебника од кои 2 (два) како автор и 2 (два) како коавтор и 8 (осум) монографии, како и повеќе научни и стручни трудови во земјата и во странство во меѓународни научни списанија. Објавените книги и научни и стручни трудови во меѓународни и во домашни списанија претставуваат значаен придонес во науката за безбедност и одбрана. Ваквиот творечки опус на активности го определуваат неговиот научен придонес во областа на безбедносните науки.

По неговиот избор за вонреден професор во 2019 година ги има напишано следните изданија: Основи на безбедност – концепциски безбедносни пристапи, како универзитетскиот учебник е издаден согласно универзитетската процедура од Универзитетот Св. Климент Охридски од Битола и Фондацијата Конрад Аденауер во 2021 година. Потоа заедно со група автори ја имаат издадено книгата „Функционирањето на безбедносниот систем на РСМ во време на вонредна и кризна состојба-студија на случај“.

Во 2020 година е издадена монографијата „Безбедносни ризици и закани –третман, феноменологија и мапирање“, од проф. д-р Марјан Ѓуровски, проф. д-р Марјан Николовски и проф. д-р Саше Герасимоски. Оваа монографија е испечатена на македонски и на англиски јазик и е во издание на Факултет за безбедност-Скопје и на Фондација „Конрад Аденауер“. Исто така, треба да се потенцира дека во истата година од печат излезе и монографијата „Безбедноста и КОВИД-19:Политичко-безбедносен систем, регионални безбедносни предизвици, нови државни актери пред и за време на пандемијата“, во издание на Канцеларијата на Фондацијата Конард Аденауер во Скопје и Универзитетот Св. Климент Охридски од Битола и е коавторство на тројца универзитетски професори и експерти по безбедност, проф. Марјан Ѓуровски од Факултетот за Безбедност-Скопје, проф. Драган Ѓукановиќ од Факултетот за политички науки од Белград и проф. Татјана Дронзина од Филозофскиот факултет при Софискиот универзитет. Интересно е да се истакне дека д-р Ѓуровски има учествувано и во подготовката на Белата книга за приватното обезбедување во издание на Комората на Република Северна Македонија за приватно обезбедување, 2020 год.

Претходно во 2019 година е издадена книгата „Вовед во безбедноста“, во коавторство на д-р Цане Мојаноски, д-р Марјан Ѓуровски и д-р Гојко Павловиќ како постојан учебник за предметoт „Современи теории и системи за безбедност“, а е во издание на Факултетот за безбедност-Скопје при Универзитетот „Св.Климент Охридски“ и Фондацијата „Конрад Аденауер“ од СР Германија.

Во 2017 година со одлука 02-2/97 од 21.12.2017 година на Деканатската управа на Факултетот за безбедност – Скопје при Универзитетот „Св. Климент Охридски“ – Битола, е испечатена книгата „Безбедносни политики и концепти“ чиј автор е д-р Марјан Ѓуровски.

Во 2018 година, со Одлука на Деканатската управа на Факултетот за безбедност – Скопје, број 02-447/2 oд 7.05.2018 година, согласно рецензиите објавени во Анекс на Билтенот на Универзитетот бр.440 од 12.04.2018 година е издадена како монографија, книгата Полицијата и јавноста“ (анализа на истражувачки резултати 2009 – 2017 година) од авторите проф.д-р Цане T. Мојаноски, проф.д-р Никола Дујовски и проф. д-р Марјан Ѓуровски. Исто така, во 2018 година со одлука 08-614/9 од 29.06.2018 година на Наставно-стручниот совет на Факултетот за безбедност – Скопје при Универзитетот „Св. Климент Охридски“ – Битола, се објави книгата „Индекс на безбедност“ од проф. д-р Цане Мојаноски и д-р Марјан Ѓуровски како монографија, согласно рецензиите објавени во Билтенот на УКЛО – Битола бр.442 од 01.06.2018 година. Ова издание беше надополнето и во 2019 година е испечатена книгата „Индекс на безбедност 2“ како Монографија согласно рецензиите објавени во Билтенот на УКЛО – Битола бр.451 од 01.02.2019 година.

Монографијата „Безбедноста на домот преку приватното обезбедување и превенција на безбедносните ризици“ беше издадена во 2019 година, а автори на книгата се Марјан Ѓуровски, Александра Деаноска, Сања Керметчиева.

д-р Марјан Ѓуровски има објавено вкупно над 55 научни трудови, објавени во меѓународни списанија и меѓународни зборници од научни собири. Низ континуирани активности со учество во научни и стручни конференции и трибини во земјата и во странство, советувања, семинари и проекти, д-р Ѓуровски е фокусиран на фундирани истражувања во областа на безбедносните науки.

Од листата за учество на домашни и на странски стручни собири, може да се заклучи дека д-р Ѓуровски активно учествува на голем број научни и стручни собири, при што презентира научни и стручни сознанија од областа која претставува негов научен и стручен интерес, при што успешно ги сублимира резултатите од богатата практична и истражувачка дејност.

Стручна-апликативна дејност и дејности од поширок интерес

Вон. Проф. д-р Марјан Ѓуровски остварил и стручно-применувачката дејност и дејност од поширок интерес. Активно бил вклучен во стручно-применувачка дејност остварил на Факултетот за безбедност при Универзитетот „Св. Климент Охридски“ – Битола и остварил повеќе експертски активности, и тоа: член на уредувачки одбор на меѓународни списанија и тоа во Меѓународно научно списание „Американски журнал за истражување” – American Journal od Research-AJR”, во Меѓународното научно списание на Националниот Универзитет за јавни услуги од Унгарија „Criminal Geographical Journal”, и во Меѓународно научно списание „Воено дело„ на Универзитетот за одбрана на Република Србија. Потоа бил Претседател на програмски одбор на меѓународен научен/ стручен собир, учествувал во изготвување и пријавување на научен/образовен меѓународен проект, бил член на Организационен или програмски одбор на меѓународен научен и стручен собир.

д-р Марјан Ѓуровски одржал предавања пред студентите од првиот циклус на студии во рамките на „Теми за основи на надворешната и безбедносна политика“ во студиската 2018/2019 година на Факултетот за политички науки на Универзитетот во Белград. Овие активности претставуваат значаен придонес во меѓународната универзитетска соработка и трансфер на нови знаења и вештини преку размена на наставен кадар и предавања. Покрај тоа на покана на Центарот за напредни студии, на Универзитетот во Софија д-р Марјан Ѓуровски во 2021 година гостувал како предавач на тема за насилниот екстремизам и радикализам во Република Северна Македонија и регионот.

д-р Марјан Ѓуровски од 2017 до 2019 година бил член на Универзитетска комисија за настава и квалитет и студентски работи. Учествувал и во изработка на Акционен план и програма за развој на приватното обезбедување на РСМ, бил институционален Еразмус+координатор на УКЛО, член во повеќе факултетски комисии, бил Претседател на неколку комисии за изработка на студиски програми на прв и втор циклус студии, а бил и претседател на Комисијата за изработка на Стратегијата за разбој на Факултетот за безбедност, остварувал и функција на секретар на катедрата за безбедност и на катедрата за Криминалистика, потоа ја предводел комисијата за стручно и за професионално усовршување на Факултетот за безбедност и Агенцијата за разузнавање на РСМ. Учествувал и во подготовка на национални документи.

д-р Марјан Ѓуровски учествувал во работата на повеќе универзитетски комисии, бил член на универзитетскиот сенат на Универзитетот Св.Климент Охридски“. Претседател е на Комисија за одликувања и признанија на Претседателот на Република Северна Македонија со Одлука на Претседателот на Република Северна Македонија од 01.08.2019 година, а учествува и во Комисијата за десиминација и промоција на МХП на Црвен Крст на Република Северна Македонија.

Во периодот 2017-2022 година, меѓу другото има реализирано повеќе значајни активности на Факултетот за безбедност и на други институции во Република Северна Македонија со што има дадено видлив придонес во областа на креирањето политики, безбедносно-одбранбената сфера, како и информирањето и комуникациите, соработката со државни и академски институции од земјата и странство и потикнува јавна дебата за актуелни теми од областа на безбедноста и сродни области кои ги покрива.

д-р Марјан Ѓуровски бил член на Комисијата за изработка на Закон за вонредна и воена состојба на Министерството за правда на РСМ. Можат да се истакнат и активностите како член на Евроатлантскиот совет на Македонија, а учествува и во работата на телото за дисеминација и промоција на МХП во Црвен крст на Република Северна Македонија и Стручниот совет на Комората на Република Северна Македонија за приватно обезбедување.