Редовен професор

На 25.05.1988 година, Наставно-научниот совет на Филозофски факултет во Скопје ја потврдува одлуката за избор на Давчев Владимир во звањето помлад асистент по предметот Основи на марксизмот на Институтот за марксизам, со што стапува во работен однос на овој факултет. Во текот на истата година се запишува на последипломските студии на Институт за филозофија и истите ги завршува со просечен успех 9.00. Работните обврски на Филозофскиот факултет во Скопје, во почетокот, ги извршува како помлад асистент по предметот Основи на марксизмот, а по трансформирањето на овој предмет станува помлад асистент на предметот Филозофија на техниката на Катедрата за хуманистички студии.

Со степенот магистер по филозофски науки Владимир Давчев се здоби во 1994 година на Филозофскиот факултет на Универзитетот „Св. Кирил и Методиј” во Скопје, со успешната одбрана на темата – „Однос ‘дух-тело’ во модерната аналитичка филозофија”, а степенот доктор по филозофски науки го стекнува во 2000 година на истиот факултет, со одбрана на докторската теза: „Свеста и аналитичката филозофија: Анализа на сфаќањето на поимот свест кај Бертранд Расел, Гилберт Рајл и Даниел Денет”.

Во 2001 година е избран во научното звање доцент. Автор е на четириесетина објавени трудови (студии и критички осврти, книги) од областа на филозофските науки.

Д-р Владимир Б. Давчев беше претседател на Филозофското друштво на Македонија во периодот од 2003 до 2007 година. Член на редакцијата на списанието Филозофија во 2006. Долгогодишен член на Редакцискиот одбор на Годишниот зборник на Филозофскиот факултет во Скопје, а во периодот 2003-2005 г. и заменик на претседателот на Редакцискиот одбор на Годишниот зборник. Назначен е за претседател на Редакцискиот одбор на Годишниот зборник на Филозофскиот факултет во Скопје во периодот 2008-2011 година. Бил член на советодавниот борд на проектот „Другиот во наставните содржини на високото образование“ инициран од Фондацијата Институт отворено општество – Македонија и член на уредувачкиот одбор на публикацијата „Истражувајќи ја другоста – Аспекти на другоста од перспектива на одделни дисциплини во високото образование во Република Македонија“.

Работи како редовен професор на Институтот за родови студии на Филозофскиот факултет во Скопје. Го зборува англискиот јазик.

Истражувачки интереси: Филозофија на духот; когнитивна филозофија; вештачка интелигенција и нејзиното општествено влијание; мажественоста во современата цивилизација.